Thursday, May 19, 2016

जन्म

होते खिसे रिकामे
कामे बरीच होती
हुर हुर अंतरी ती
होती अगम्य भीती

मोजून पाहिले ना
माझे मला कधी मी
आले प्रसंग नाना
पाण्यात पोहताना

हातात सूर्य येता
उजळीत विश्‍व गेलो
अन स्‍नेह-चांदण्‍यात
मी अमृतात न्हालो

विश्‍वास मनी होता
श्‍वासात छंद आणि
रंगात चींब होता
मी इंद्रधनू झालो

मित्रांसवे असे मी
माझे मलाच गुणले
एकाच आयुष्याचे
मी जन्म दहा केले

आठव

आठव मनात
नित्याचाच उभा
सभा भरविती
प्रियजन      १

बोल कोणाचे ते
गुंजती कानात
कोणी हासतसे
गोडगोड     २

कोण धरी हात
कोणी घे जवळ
कवटाळी कोणी
हृदयाशी     ३

हात खांद्यावरी
येई कुठुनसा
फिरे केसातून
अलगद       ४

कौतुकाची दाद
दुरुनची साद
लटिकाची वाद
आठवतो     ५

खेळातले क्षण
क्षण खेळकर
हास्‍याची लकेर
सर्वदूर       ६

कोटीवर कोटी
शब्दांची शेकोटी
बोलण्‍याची खोटी
हासू फुटे      ७

बैसली पंगत
त्यात असे सण
पाहुणे तशात
संगतीला     ८

बैसोनी जवळ
प्रश्‍न ते प्रेमळ
प्रसन्न आभाळ
भोवताली    ९

जरी दूरदेशी
भेट क्षणोक्षणी
जशी ती पक्षीणी
तुकोबाची    १०